ஆகஸ்ட் 2014 – ஓம் சக்தி நாளிதழில் லாவண்யா பெருமாள்சாமி என்ற பெயரில் வெளியானது

என் பெயர் சுதாகர். நான் வருமான வரித்துறையில் வேலையில் இருக்கிறேன். இன்று மைதிலியைப் பெண் பார்க்க என் இரண்டு அண்ணன்கள், இரண்டு அண்ணிகள், தம்பி மற்றும் அம்மா புடைசூழ சென்றிருந்தேன்.

என்னைப் பார்த்ததும் மைதிலிக்குள் ஓர் அதிர்வு ஏற்பட்டதை அவளின் பட்டாம்பூச்சியைப் போன்று படபடக்கும் விழிகள் எனக்கு உணர்த்தின. அவள் விழிகளின் தாளத்திற்கு ஏற்ப என் இதயம் முரசு கொட்டியதை அவள் அறிய மாட்டாள்.

முதன் முதலாக மைதிலியின் சாந்தமான அழகு முகத்தைப் புகைப்படத்தில் பார்த்ததும், அவள் என்னுள் உறைந்துப் போனதாகவே உணர்ந்தேன். ஏனோ அவளிடம் உடனே பேச வேண்டும் என்று என் மனம் துடியாய்த் துடித்தது.